لو حضرتك ناوى تشترى عربية قريب وتبدأ فى مغامرة السواقة فى مصرنا الحبيبة او لو لسه بتسوق جديد يبقى لازم نقولك على شوية وصايا تحفظهم وتاخد بالك منهم وانت سايق وماتعملشى ناصح بقه وتقول  "انا لسه شارى عربية زيرو وقررت انى امشى على مهلى واخد بالى واركز وانا سايق "

هاقولك كان غيرك أشطر يابيه لان كلنا قولنا زيك كدا وفى الاخر برده هتلاقى عربيتك مخبوطة او مخيشة لان للاسف ان نسبة كبيرة من الخبطات الـ فى عربياتنا بتكون من اخطاء غيرنا .. وعشان كدا دايما اى حد بيعرف يسوق ويتعامل فى مصر يقدر يسوق فى اى بلد فى العالم لان فى مصر انت

مش بتسوق العربية الـ انت راكبها بس .. دا انت بتسوق 4 عربيات ( واحدة على يمينك وواحده على شمالك وواحده قدامك وواحده وراك ) ... تعالو ندخل فى الوصايا بقا

المطبات

ودى اخطر حاجه لان مطب واحد مصرى قادر انه يقلب العربية لو انت بتجرى وللاسف احنا ماعندناش هنا سياسة انه يحطلك يافطه قبل المطب ب 100 متر يقولك ان انت داخل على مطب , دا غير ان المطبات مش بس الحكومة هيا الـ بتعملها لا لا اى حد ممكن يقرر يعمل مطب فى اى حته ودور بقه على الـ هيشيل المطب ده ..
والمشكلة الاخطر المطبات الـ بتكون على الطرق السريعه فالنصيحة هنا لو طريق غريب عليك حاول تمشى ورا عربية تكون حافظة المطبات عشان ممكن لو أكلت مطب هيكلفك كتير اوى

الحفر

الحفر دى بقه عكس المطبات بس أخطر منها اوى وفى منها نوعين الحفر الصغيرة الـ مش بتزيد عن متر والحفر الـ بتبقى بطول الطريق ودى بتتعمل بنفس الهدف بتاع المطب بس تلاقى الـ بيعملها بيكسل يبنى المطب فبيقوم شايل الاسفلت بطول الطريق.. طيب هانقول لو جاى بتجرى على مطب واكتشفته قبليها هاتضرب فرامل كويس وقبل المطب هاتستمتع بالطيران انما لو حفر بقه فهتكون النتيجة أبشع لان ممكن تكسر أكس او تكسر جنط ..

البلاعات

سواء كانت البلاعه مكشوفة او متغطيه .. خاصه لو المتغطية دى مستواها عالى .. ودى لو بتجرى هاتدمرلك الشكمان اكيد دا لو ماشلتشى الاكصدام الـ قدام

الموتسيكلات

الـ هو المكن –لامؤاخذه – وده ماتحاولش تدور عليه فى المرايا لانك هاتسمعه وبس .. بس لما تسمع صوته بلاش تروح يمين ولا شمال

سواقه الستات

وما أدراك سواقة الستات ودى عايزة مواضيع نتلكم فيها – بس للامانه فى منهم سويقه – ودول نسبتهم واحد فى الالف .. هاتقولى طيب انا اعرف ازاى ان الـ قدامى دى واحده مش واحد ..

هاتعرفها يابيه وشوية شوية هاتبقه خبره وتراهن الـ راكب جمبك ان الـ سايق قدامك ده انه ست .. وهتطلع ست يعنى بقه هتلاقيها فاتحه اشارة يمين وداخله شمال او العكس او تلاقى العربية بتريح عليك بدون اى اشارات او مقدمات او هتلاقيها قدامك عايزه تعدى عربيتين قدامها وهاتك زمامير

وكلاكسات مع ان السكه قدامها تجيبها مستريح

جدو الـ راكب فيات 128 او 131

اوعى تتريق على السرعه القصوى الـ بيمشوا بيها ههههه لان هيجى يوم عليك وهاتلاقيك ماشى زيهم بالظبط دول لازم تستحملهم لانه لو قرر يشد معاك بالعربية هيزعلك .. انت بس حاول تديله كالاكس وهو هيعديك على طول بس طول فى الكلاكس شوية

الميكروباصات

اوعى تفتكر انك هاتكون اصيع منهم .. دول عفاريت الأسفلت يابا وعارفين مقاسات عربيتهم وعربيات غيرهم بالملى فمتتناصحشى معاهم عشان اكيد خبطتهم بتزعل

التكاتك

ودول سواقين عيال معظمهم .. وماتستغربشى لما تلاقيه فى المراية جاى من وراك وعايز يدخل قدامك .. لانه فى الحقيقة بيدخل هاتقولى ازاى هاقولك معرفشى

ودى كانت اهم وصايا لازم تاخد بالك منها والا قول على عربيتك يارحمن يارحيم .. وبرده لو انت سايق بقه و لقيت حاجات غريبة بتحصل زى واحد قرر ياخد الـ Uturn وفى الاخر رجع فى كلامه وكسر عليك او واحد جاى من يمينك وقام فاتح اشارة شمال وعايز يعدى من قدامك عشان يدخل فى الـ uturn  ماتعصبشى نفسك لانك ياماا هاتشوف .