خرافات بتصدقها الأمهات اثناء الرضاعة الطبيعية.. لازم تنتبهي لها

الثلاثاء , 25 ديسمبر 2018 ,3:29 م , 3:29 م

لو كنتي أم جديدة اكيد في بعض التفاصيل في موضوع الرضاعة والامومة بتكون مش واضحة ومش عرفاها لسه، ودايمًا بتكوني خايفة وقلقانة من اي تصرف بتعمليه علشان لا يضر المولود، حتى اكلك وشربك بتراعيه خوفًا من ان ده يأثر على الرضاعة ونمو المولود، وعلشان كده لهلوبة هتقولك ايه هو اللي ينفع تعمليه واللي لا يجب فعله اثناء الرضاعة الطبيعية.

خرافة: مزيلات العرق مضرة اثناء الرضاعة:

في شائعة بتقول ان استخدامها وبالتحديد اللي بتحتوي على الالومنيوم اثناء الرضاعة الطبيعية، ده بيكون سام على نسيج الثدي، والحليب، ويفضل اختيار المنتجات الخالية منها، ولكن الحقيقة ان في استاذ مساعد في طب الاطفال بجامعة UCSF Fresno، يُدعى دكتور "ايمي ابو شمسية"، قال ان لا يوجد اي دليل على ان الام المرضعة يجب الا تستخدم مزيلات العرق، وان ده مش بيأثر على الحليب، لان المنتجات الجلدية لا يمكن لها ان تؤثر على عملية الرضاعة.

ولكن بردوا يفضل انك لا تستخدمي اي منتجات عطرية، لان الاطفال حديثة الولادة ممكن تتأثر بالريحة دي، وكمان احرصي ان المزيلات لا تلامس حلامات ثديك لان ده ممكن يأثر عليها جدًا.

خرافة: ممنوع اي مسكنات للألم:

في شائعة بتقول ان ممنوع الام المرضعة تأخذ منها، او حتى مخفضات الحرارة، ولكن الحقيقة ان النوع ده من الادوية مش بيسبب اي ضرر عليها، وفي انواع منهم ممكن تكون كويسة ومناسبة، وده وفقًا لتقارير من الاكاديمية الامريكية لطب الاطفال "AAP"، ولكن حاولي تجنب في الفترة دي مضادات الاحتقان، لانها بتقلل من انتاج الحليب، و مضادات الهيستامين لانها بتجعلك نعسانة وبتضعف قدراتك.

وفي كل الاحوال يفضل مراجعة طبيب الاطفال المتابع لحالتك، قبل تناول اي علاج، حتى لو كان الدواء ده آمن اثناء الرضاعة الطبيعية، وعلشان تكوني حذرة اكتر، احرصي انك تقللي الجرعة من اي علاج بتتناوليه في المرحلة دي.

خرافة: تجنبي تناول القهوة اثناء الرضاعة:

لو كنتي ام مرضعة ومحتاجة لكوب من القهوة في يومك، لا تخافي من صب القليل منها، لان في اشاعة بتقول انها بتأثر على حليب الأم، ولكن الحقيقة ان في ابحاث علمية اثبتت ان كمية الكافيين اللي بتحصلي عليها، لا تصل لطفلك الا نسبة صغيرة جدًا منها.

ولكن احرصي انك لا تتناولي اكتر من كوب لـ 3 يوميًا، علشان الكافيين لا يتراكم في جسم الطفل.

خرافة: لازم تقللي من السعرات الحرارية علشان وزنك يقل بعد الولادة:

الحقيقة هنا ان مش مطلوب منك تقللي من الوجبات اللي بتتناوليها علشان تنقصي وزنك اللي اكتسبيته بعد الولادة، وده لان عملية الرضاعة الطبيعية بتحرق حوالي 500 سعر حراري يوميًا، وده كفاية علشان ترجعي لوزنك اللي كان عليه قبل الحمل.

ولو عاوزه تفقدي وزنك بشكل اسرع بجانب الرضاعة، تأكدي انك لا تتناولي اقل من 1800 سعر حراري في اليوم، وانك توازني بين وجباتك، وتاكلي الطعام المغذي، وتتجهي لتناول الدهون الصحية الموجودة في الافوكادو والمكسرات والفواكه والخضراوات والبقوليات واللحوم الخالية من الدهون.

ويفضل انك تتبعي نظام غذائي معين لمدة شهرين بعد الولادة علشان ترجعي زي الاول، وافضل طريقة انك تعرفي بها ان وزنك مظبوط هي انك تبصي لجسمك وتكوني راضية عن شكله، وانك تاكلي وقت جوعك واوعي تمنعي نفسك من تناول اي حاجة مفيدة علشان تفيدي المولود.

اقرأ الخبر من مصدره

المصدر | لهلوبة