5 خرافات عن الدورة الشهرية، وقت الدورة الشهرية بيعتبر من الفترات المقلقلة عند كل بنت، ده لانها بتسبب ألم جسدي ولخبطة في الحالة النفسية، وكمان فيه خرافات منتشرة عنها، "لهلوبة" هتعرفك عليها علشان متصدقيهاش، لان مالهاش أي أساس علمي ولا طبي ومن ضمنها:

 

1- الدورة بتتكرر كل 28 يوم:

ده يعتبر الرقم الشايع عند معظم البنات، لكنه ميعتبرش قاعدة، لان الدورة ممكن تتراوح بين 21 و 35 يوم، وممكن تختلف كل شهر حسب حالتك النفسية والصحية، والأطباء بينصحوا انك تحسبي أيام ومواعيد الدورة بدقة، لان الدورة المنتظمة بتعتبر دليل على الصحة الجيدة.

 

2- البعد عن السباحة خلال فترة الدورة 

من اكبر الخرافات اللي طلعت على الدورة، ان مينفعش تعومي وهي عندك، بالعكس السباحة بتقلل من تقلصات البطن وبتخفف من آلامها، لكن لازم تغيري الفوطة الصحية قبل ما تعومي وحاولي تلبسي مايوه غامق، وممكن تستخدمي "التامبون"، لانه هيحميكي من نزول أي دم غير مرغوب فيه وقت السباحة وكمان أفضل من الفوطة الصحية اللي ممكن تتملي بالميه وتخرج من المايوه وتعرضك لموقف محرج.

 

3- تجنب التمرينات الرياضية:

اتمرني عادي وقت الدورة ومتقلقيش، بالعكس الرياضة بتخفف الألم وبتساعد على استرخاء الجسم، لكن لو كنتي بتعاني من نزيف حاد، هنا لازم تستشيري الدكتور قبل ما تتمرني، لان ممكن تتصابي بفقر الدم.

 

4- الدورة الشهرية بتنضف الجسم:

مفيش أي علاقة بين نزول دم الدورة اللي كتير بيقولوا عليه "دم فاسد"، وتخليص الجسم والجهاز التناسلي من السموم، لان الحيض بيمثل نهاية روتين ثابت بيحصل في جسم المرأة كل شهر، فبتحصل تغيرات وفيه أنسجة جديدة بتنمو في بطانة الرحم، كاستعداد لاحتمال وجود جنين، ولما مبيكونش فيه تخصيب بتبقى الأنسجة من غير فايدة وبتيجي الدورة.

 

5- تعايشي مع نزيف الدورة الشهرية:

لو حسيتي بنزيف حاد خلال أيام الدورة، لازم تلجأي للدكتور على طول، علشان ده يعتبر أمر غير طبيعي إلا في بعض الحالات الخاصة اللي لازم الدكتور يكشف عليها برده.