اقرب طريق لقلب الرجل معدته..اهم اسباب حب الراجل للست

"اقرب طريق لقلب الرجل معدته"..اهم اسباب حب الراجل للست

الثلاثاء , 12 ديسمبر 2017 ,11:53 ص , 11:53 ص

احنا كستات ساعات بنقابل فجوة كبيرة بينا وبين الرجال خاصة في جزئية المشاعر، مثلاً بنلاقيها عند البنت من الحاجات المهمة، وبتكون واضحة وبتظهر من خلال تصرفاتها واسلوبها وطريقة تعاملها على عكس الولد اللي غالبًا مش بيعرف يعبرعن مشاعره وبتظهر بصعوبة، وبنلاحظها كمان في العلاقة الزوجية، ممكن نلاقى الزوج بيحب زوجته وبيقدرها بس مش شرط انه يعبر عن ده او يقول، بس في كم نقطة مشتركة بيحبوها الازواج في زوجاتهم لكن مش بيشاركوها مع حد، ولا حتى مع زوجاتهم احيانًا، لهلوبة بتقولك على النقط الاساسية اللي بيحبها الراجل في الست.

1- الاعتماد على النفس:

الراجل بيحب الست الجدعة، اللي بتعرف تتصرف، ولما تلاقي حاجة محتاجة تتعمل بتظبطها على طول من غير تفكير، كمان بيحب انها تساعده من غير ما يطلب منها ده.

2- الذاكرة:

احنا كبنات بنفتكر كويس غالبًا وبنركز اكتر من الرجالة وبنلاحظ وادق واصغر الاحداث، بعكسهم بينسوا بسرعة.

3- الدعم:

نسبة كبيرة من الستات بتمتلك قدرة وطاقة عالية في الدعم وزي ما بيقولوا "وراء كل رجل عظيم امراة عظيمة" بتسند وتساعد وتكون جانبك في المُرة قبل الحلوة، ومعظم النماذج الناجحة بتشير لوجود عنصر المراة في حياتهم بشكل اساسي سواء كانت "أم او زوجة او اخت".

4- الحب:

الستات عندها طاقة مشاعر رهيبة خاصة لما بتحب بجد، بتلاقى مشاعرها بتترجم تلقائيًا في كل لحاجة لدرجة انها بتظهر حتى في نظرة عينيها، كمان بتقدر تتغاضى عن غلطات كتيرة، وبتعرف تعدي ده كله،ومش بتستنى مقابل كل حاجة بتعملها، عكس معظم الرجال اللي عندهم الحب مش من الاولويات.

5- التعب:

بنلاحظ ان الست مهما تعبت بتحاول تقف على رجلها، وتكمل كأنها سليمة بالظبط، وبيستمر نمط حياتها اليومية كالمعتاد، ومش بتظهر تعبها ده، ولو شافت جوزها تعبان بتفضل معاه وجانبه لحد ما يتحسن ويرجع احسن من الاول.

6- الطعام:

معظمنا كستات مبدعين في المطبخ، وبتلاقي كل واحدة لها اكلة معينه سواء كانت "وجبة او حلويات" شاطرة فيها وبتطلع امكانيتها كأنها بتضع عليها وصفة سحرية، وبنحاول كمان نقدم اطعمة مختلفة وجديدة سواء في المناسبات او الايام العادية ونختار الواجبات الصحية بحيث تكون مفيدة ولذيذة في نفس الوقت، الراجل بيحب الست اللي نفسها حلو في الاكل لان زي ما بيقولوا "اقرب طريق لقلب الراجل معدته".

7- التوقع:

زي ما تقول كده عندنا "الحاسة السادسة"، واجهزة رادار خاصة جوانا او تقدر تقول ترمومتر بنقيس به مشاعرنا، بتلاقي فينا درجة عالية من الاحساس تجعلنا ممكن نتوقع ايه اللي ممكن يحصل ودي حاجة بيحبها الرجال.

8- الذكاء:

في ستات بتكون شاطرة فعلًا وبتقدر تنسق كلامها وتختار الكلام المناسب في الوقت الصح وتتكلم بلباقة شديدة، حتى لو كان الموضوع صعب تقبله، هي باسلوبها الحلو بتحوله لسهل، وبتعرف تاخد الحاجة اللي هي عايزاها بس بطريقة لطيفة.

9- الهدوء:

الستات الهادية رزق، لانها بتعرف تمتص عصبية اللي قدامها ببساطة وتعرف تتناقش بهدوء لحد ما توصل لحل، وبتفكر كويس قبل اي قرار وتحكم عقلها صح.

10- الامومة:

معظم الستات لما بيكونوا امهات بيتغيروا وبيحسوا بالمسئولية اكتر، وتاثير الأم بيكون عظيم في حياة الاطفال، ومهما كان عددهم كبير تلاقيها بتقدر توفق بينهم وبين بيتها وبيكون عندها قدرة رهيبة انها تستحمل، سواء في تربيتهم او دراستهم وتكوين شخصيتهم، كفاية عليها العياط وقلة النوم ودي حاجة مش بيقدر عليها الرجال او انه يتحمل مسؤلية طفل بالكامل.

11- الدقة:

معظمنا بيحب النظام وبنحاول علي اد ما نقدر نختار كل حاجة بعناية شديدة، ونضع كل حاجة في مكانها بترتيب علشان كده لو سألتها عن حاجة بتعرف تجيبها بسرعة.

12- الذوق:

في حين ان الراجل ممكن يكون لسه راجع من الشغل وتعبان ومش فاضي انك تنسق لبس لبكره او محتار في لبسك بتلاقيها معاك بتساعدك وعندها قدرة انها تنسق الالوان بطريقة جذابة وانيقة.

اقرأ الخبر من مصدره

المصدر | لهلوبة