10 ألعاب مختلفة لتنمية مهارات ابنك من 6 شهور

الإثنين , 18 سبتمبر 2017 ,12:47 م , 12:47 م

الطفل لما يبدأ شهره السادس بتبدأ مشاعره وملاحظاته وطرق تعليمه وتفكيره تتغير، وكل ده بيساعده يستكشف الحياة ويتعلم حاجات جديدة اكتر، واللعب معاه في السن ده لازم يشمل ألعاب تنمي مهاراته العقلية مش بس تضحكه ولا تسليه، علشان كده لهلوبة جابتلك مجموعة من الألعاب اللي هتساعدك تعملي ده مع طفلك لحد ما يتم سنة كاملة في عمره.

1- الغميضة:

خبي لعبة او كتاب او أي أداة تحت البطانية وسيبي جزء منهم باين لطفل واسأليه هم فين؟ الطفل لما يلاحظ طرف الاداة هيشدها أو يدخل تحت الغطا يجيبها، ولما يحترفها ابدأي في تطويرها بإنك تخبي الحاجة تماما وتساليه عنها.

2- الترتيب:

استخدمي الكوبايات البلاستك او الورق في انه يعمل بيهم أشكال بترتيبهم فوق بعض، اجعليه يرصهم معاكي بالتناوب بينكم او ساعديه في الترتيب، ده هيعلمه التنسيق بين عقله وإيده وكمان هيزود إبداعه.

3- البازل:

قبل عيد ميلاد الطفل الأول اشتري له علبة بازل كبيرة ويستحسن تكون ملونة والعبي بيها معاه وممكن تساعديه في حاجات بسيطة لكن سيبي له الجزء الأكبر من حلها، ده بيعلمه مهارة حل المشكلات والربط بين النظر والتفكير.

4- القراءة:

لازم دايما تقرأي لطفلك، واختاري كتب فيها صور كتير، وفرجيه عليها وهو بيسمع حكاياتك، ده بينمي اللغة والتعبير عنده ومهارة الاستماع.

5- التصفيق:

علميه يصفق في عمر من 6 – 8 شهور على نغمة مش لازم تبقى أغنية لها كلمات المهم يتعلم المهارة نفسها.

6- القافية:

استيعاب الطفل بيبدأ بدري جدا قبل مهارة التكلم، علشان كده مهم إنك تقعدي تغني معاه اغاني ليها كلماتها فيها قافية، لانها هتساعده في الكلام والتمييز بين الكلمات اللي شبه بعض.

7- ألعاب الزجاجة:

املي زجاجة بلاستك شفافة بالرز أو أي مادة تعمل صوت وخليه يرجها ويسمع الصوت اللي طالع نتيجة الحركة دي، بالطريقة دي الطفل هيتعرف على أصوات جديدة ناتجة عن حركات جديدة ويفرق بين صوت الزجاجة الفاضية والمليانة.

8- الاخفاء:

خبي حبوب فول أو شوية كورن فليكس جوة كوباية وقوليله يدور عليهم لحد ما يلاقيهم، حاجة شبه لعبة التلات ورقات مع الطفل علشان تنمي تركيزه وذاكرته.

9- ألعاب الإضاءة:

استخدمي فلاش، وأكتر من كوباية ملونة بألوان مختلفة، واجعليه يتعرف على تغيير لون الضوء مع تغيير المصدر اللي خارج من خلاله الضوء.

10- التلوين بالصوابه:

استخدمي نوع الوان صحي لاطفال وبيتزال بسهولة واجعليه يضع يده فيه ويلون الورق ويستحسن لو اتعلم يستخدم صوابعه في رسم خطوط وأشكال ده بيسهل عليه تعلم الكتابة.

اقرأ الخبر من مصدره

المصدر | لهلوبة