5 تصرفات من الأهل بيسببوا فشل أولادهم.. اعرفيهم

الاحد , 17 سبتمبر 2017 ,11:05 ص , 11:05 ص

كل أب وأم بيحلموا إن أولادهم يبقوا ناجحين وأقويا في المستقبل، لكن للأسف في بعض التصرفات بتطلع من الأهل من غير قصد وبدافع الحب والحماية بتتسبب في تربية أجيال غير قادرين على الاعتماد على نفسهم، ولهلوبة قررت تعرفكم على التصرفات دي، علشان تتجنبوها، وهي:

- مش بيسمحوا بالمخاطرة:

كل أب وأم بيخافوا على أولادهم وبيبعدوهم عن الخطر قدر الإمكان، لكن الخوف الزايد من كل حاجة بيربي عندهم فوبيا من العالم الخارجي وبيجعلهم يمتنعوا عن تجربة أي حاجة ضرورية في المستقبل.

- بنتدخل للإنقاذ بسرعة:

بنفس دافع الحب والخوف لما الطفل بيتعرض لأي مشكلة الأهل بيتدخلوا قبل حتى ما يسمحوا له إنه يلاقي حل بنفسه وده غير صحيح، المفروض انه يحاول يعتمد على نفسه ويتعلم يلاقي حلول للمشاكل خصوصا لو كانت بسيطة ويقدر يسيطر عليها وإلا هيفضل طول عمره متواكل واعتمادي.

- بنجامل الطفل كتير:

لو الأهل جاملوا طفلهم على كل تصرف صغير هيبقى في مشكلة من اتنين يا إما بيطلع نرجسي شايف إن العالم كله لازم يجامله زي ما أهله بيقدروه، أو محبط مش واثق في كلام أهله لأنهم بيبالغوا في كلامهم عنه، وفي الحالتين ده بيضر بشخصيته، المجاملات والمدح في التصرفات الحلوة ضرورة لكن بالعقل ومع العقاب على التصرفات الغلط.

- مش بنحكي عن غلطاتنا:

الأب والأم بيحبوا يبقوا مثل أعلى للطفل لكن ده معناه انكم تحكوا عن مثاليتكم في نفس سنه، لانه اوقات كتير مش بيصدق ده، وبالتالي الدرس بيبقى عكسي، الأحسن اننا نشارك غلطاتنا بصراحة وازاي اتعلمنا منها، ده درس واقعي أكتر وأحسن للطفل.

- بنخلط بين الموهبة والذكاء والنضج:

الذكاء مش مقياس لنضج الطفل، ممكن جدا يكون ابنك لماح وذكي وبيفهم بسرعة بس لسه مش مستعد يتعامل مع عالم الناضجين، علشان كده حتى لو ذكي لازم يتعامل على إنه طفل ومسئولياته مسئوليات طفل مش شاب ناضج وإلا بيفضل مفتقد لطفولته.

اقرأ الخبر من مصدره

المصدر | لهلوبة