امتى تتخلصي من ادوات مكياجك

الاحد , 10 سبتمبر 2017 ,9:49 ص , 9:49 ص

معظمنا بنقع في غلط استخدام ادوات المكياج فترة طويلة، دون النظر ان لها مدة محددة للاستخدام وبعدها لا يفضل التعامل معاها، حتى لو كانت صلاحيتها لسه مستمرة، لتجنب ضرر البشرة وظهور حبوب والتهابات عليها، ولهلوبة هتقولك الوقت المناسب اللي تتخلصي فيه من مستحضرات التجميل الخاصة بيكي.

1- المانيكير:

علشن تعرفي هو صالح للاستخدام ولا، رجي الازازة بسرعة، لو لاحظتي ان مكوناتها لسه منفصلة عن بعضها "بمعنى انها لسه بتترسب في القاع والجزء التاني بيطفو على السطح"، فده معناه ان جه الوقت اللي لازم تتخلصي منها، وبوجه عام بيكون صالح للاستخدام لمدة سنة على الاقل.

2- ملمع الشفايف:

لو لاحظتي ان مكوناته بقت لزجة او ان طعمه وريحته غير مقبولين في فمك بعد وضعه، لازم تتخلصي من العبوة على طول.

3- الروج:

لو لاحظتي تغير في ريحته وعدم تقبلك لها هنا لازم تتخلصي منه، وفي طريقة تانية وهي اذا حسيتي بحرقان او جفاف في شفايفك بعد وضعه، يبقى اصبح غير نافع للاستخدام، وعادة صالحيته بتستمر لمدة 3 سنين.

4- كريم الترطيب:

بيفقد مفعولة بعد 6 شهور، وعلشان كده لازم بعدها تغيريه وعلشان تطولي مدة استخدامه، اقفلي العلبة كويس بعد كل استعمال لمنع تراكم البكتيريا الضارة عليه.

5- فرش المكياج:

لو لاحظتي ان شعرها بقى ممزق او سقط من بعض المناطق في الفرشاة، هنا لازم تغيريها.

6- الماسكارا:

سهل تتعرفي على مدى صلاحية استخدامها، لو لاحظتي ان السائل الموجود فيها بدأ يجف او يتحول لكتل وصعب تفرديها على الرموش، فده يعني انها فسدت ولازم تغيريها، وعادة لازم تغيري الماسكارا كل 3 شهور للحفاظ على العين والرموش.

7- كريم واقي من الشمس:

غالبًا صلاحيته مستمرة لمدة سنة من وقت استخدامه، كمان العبوة بيكون مكتوب عليها تاريخ الانتهاء.

8- البرفيوم:

ريحته مستمرة لسنين طويلة يمكن اكتر من 5 سنوات، لكن لو عايزة تحافظي عليه ممكن تحفظيه في التلاجة او بعيد عن الشمس، لمنع تأكسد مكوناته، خصوصًا في الصيف لارتفاع نسبة الرطوبة.

اقرأ الخبر من مصدره

المصدر | لهلوبة