نصايح للعناية الشخصية خلال الدورة الشهرية

الأربعاء , 30 أغسطس 2017 ,12:04 م , 12:04 م

الستات بيعانوا من آلام الدورة الشهرية، وحالتهم النفسية بيتغير فيها بشكل كبير، ومهم جدًا خلال الفترة دي انها تهتم بنضافتها الشخصية والاستحمام، لتحسين حالتها، ولمنع ظهور الالتهابات والحبوب، وكمان تجنب اي ريحة كريهة، ولهلوبة هتقولك طرق تهتمي بيها بنضافتك خلال الدورة الشهرية:

1- الجسم خلال الفترة دي بيفرز عرق بكميات كبيرة وبيكون معرض لتراكم البكتيريا والجراثيم والتهابات في المنطقة الحساسة، علشان كده مهم جدًا ان تاخدي حمام دافي يحسسك بالهدوء والراحة ويمنع اصابتك بالامراض.

2- يفضل وقت الاستحمام تستخدمي الدش بدل الجلوس في البانيو، لمنع اصابة المهبل بالبكتيريا والامراض.

3- اغسلي المنطقة التناسلية بميه دافية وصابون اطفال غير معطر، او غسول خاص بالمنطقة الحساسة خالي من اي مواد كيميائية او عطرية، لمنع التهابها.

4- دلكي جسمك خلال الاستحمام بحركة دائرية خفيفة، هيساعد على تخفيف الألم والتقلصات وبينشط الحركة الدموية.

5- احذري انك توجهي تيار ميه قوي على منطقة المهبل، لانه ده هيؤدي لدفع جميع الاوساخ للداخل، اسكبي الميه بلطف مع التشطيف من الامام للخلف مش العكس.

6- احرصي على ارتداء ملابس داخلية مصنوعة من القطن، لانها بتمتص العرق بسرعة، وبالتالي بتقلل نمو البكتيريا ويفضل تغيريها بشكل يومي.

7- احرصي على ازالة الشعر الزايد من المنطقة باستمرار وبطريقة مناسبة، للحفاظ على نضافتها ومنع تكون البكتيريا والجراثيم.

8- يفصل تغيري الفوطة الصحية كل 6 ساعات على الاقل، حتى لو كان الدم عليها قليل، لمنع تعرض المهبل للالتهابات.

اقرأ الخبر من مصدره

المصدر | لهلوبة