افكار لترتيب واستغلال المساحات الصغيرة في البيت

الثلاثاء , 29 أغسطس 2017 ,1:45 م , 1:45 م

ستات كتير بيلاقوا صعوبة في استغلال المساحات الموجودة عندهم في البيت، وعدم قدرتهم على تنظيم الاشياء ووضعها في مكانها الصحيح، وبما ان العيد قرب ومعاه وقت التنضيف والترويق، لهلوبة جابتلك افكار عملية علشان تستغلي المساحات بشكل منظم وتسهل عليكي عملية التنضيف.

1- دواليب المطبخ:

من الاماكن اللي مش بنعرف نرتبها بشكل صح وبتبقى دايما في حالة فوضى، وده لعدم قدرتنا على استغلالها صح، لو انتي عندك الدولاب بارفف ممكن تستغلي كل رف بطريقة عملية يعني ممكن تضعي في سقف واحد منهم عليقات صغيرة تعلقي فيها الماجات والفنجانين وتستغلي باقي الرف في رص حاجات تانية، وممكن كمان تستخدمي مساحة الرف الكبيرة بوضع استاند سلك صغير و حاجات فوقيه وتحتيه وجنبه زي ما هو باين في الصورة، أو ممكن ترصي العلب والكوبايات في صف فوق بعض عشان توفري في المساحة، وبكده تبقي استغليتي كل المساحات بقدر الامكان .

2- ممكن تنظمي الدولاب المخصص للمفروشات والفوط، بوضع اكتر من باسكيت جنب بعض وتقسمي فيه الحاجة، يعني مجموعة للمفروشات والتانية للفوط، ممكن تلزقي عليهم ملصقات تكتبي ايه الموجود جوه كل باسكيت.

3- ممكن تنظمي التلاجة بطريقة سهلة، احضري كذا باسكيت بلاستيك صغيرين وترصي في واحد الازايز والتاني البرطمانات او العلب، ولو عندك اكياس محفوظ فيها حاجة ضعيها في باسكت تاني لوحدها، هتلاقي التلاجة عندك اترتبت وشكلها اختلف، حتى هتسهل عليكي كتير جدا لما تيجي تنضفيها .

4- الادراج اللي بتبقى دايما زحمة بحاجات كتير ممكن تترتب بطريقة بسيطة جدا، احضري اطباق بلاستيك صغيرة باحجام مختلفة وضعيها في الدرج بالطول وبالعرض حسب حجم الدرج عندك ورصي فيهم الحاجة بتاعتك .

5- لو عندك الاوضة مساحتها صغيرة وفيها حاجات كتير عاملة زحمة ومش عارفة توديها فين، اعملي رفوف مقفولة جنب بعض لمي فيها كل الحاجات دي وفي نفس الوقت كمان هتبقى زي الكنبة، وبكده يبقى استغليتي المساحة صح بانك عملتي مكان للتخزين وللقعدة وكمان رتبتيها.