5 طرق لتأديب الطفل من غير زعيق ولا ضرب

Saturday , 26 أغسطس 2017 ,4:45 م , 4:45 م

اوقات كتير بيصدر من الاطفال تصرفات بيكون لازم يتعاقبوا عليها، وانتي كأم لازم تأدبيه بطريقة تكون فعالة ومناسبة لسنه وشخصيته، لحد ما تضمني انه مش هيكرر الغلط ده مرة تانية، ولهلوبة جابتلك طرق مختلفة لعقاب الطفل، علشان تختاري منهم المناسب ليه، بدل من الضرب والزعيق اللي اضراره اكتر من فوايده.

1- اختيار عقوبات منطقية:

فكري في حيلة ممكن تعاقبيه من خلالها ويصدقها فعلا، وتكون هتحدث تغيير فعلي وايجابي في سلوكه، زي انك تحرميه من لعبته المفضلة لبعض الوقت، لحد لما يعرف غلطه ويعتذر.

2- توجيه الطفل لسلوك افضل:

الدكتور بن سيجل، الرئيس السابق للجنة "APP " النفسية والاجتماعية لصحة الطفل والاسرة، بينصح الام انها تعمل ده من خلال وضع قواعد محددة مناسبة لسن ابنها، بحيث تتفق معاه انه لو خالف القاعدة هيتعاقب بحاجة معين، زي: انه يعلق هدومه على الشماعة والا هيدفع غرامة يقدر يتحملها، او انك ممكن تقللي من مصروفه او تحرميه من تناول الحلويات اللي بيحبها، والخبراء بينصحوا ان القرارات دي تكون بالتعاون مع الطفل، وان الام تشجع طفلها على اقتراح حلوله الخاصة للقضايا السلوكية اللي بيواجهها.

3- حجب امتيازات الطفل:

الخبراء بينصحوا الامهات انهم ممكن يعاقبوا اطفالهم على تصرف غلط عملوه، من خلال حجب امتيازات عنهم او حاجات عزيزة عليهم، زي حرمانهم من مشاهدة عرض مسرحي بيحبوه ، ده هيأثر عليهم بشكل كبير وهيضطر انه يعتذر ويدرك غلطه ويسمح للام بالكلام مع طفلها بهدوء.

4- استخدام حجج غير قابلة للتفاوض:

بعض الخبراء بينصحوا الام باستخدام ردود حازمة خلال عقابلها لطفلها، وممكن تظهر بعض التعاطف زي انها فاهمة قد ايه هو مستاء ومتضايق، لكن قرارها نهائي وبلا رجعة، لحد لما يدرك غلطه ويتجنب تكراره.

5- وقت مستقطع للعقاب:

من الطرق الفعالة بس محتاجة لصلابة وحزم في تنفيذها، علشان تمنع تمرد الطفل عليها، انك تقوليله ان كل ما هيغلط او يتصرف بشكل غير لائق، هتعاقبيه لمدة دقايق محددة حسب سنه، وحددي مكان العقاب سواء كرسي او مكان معين، وكل ما بكى او قرر يعترض ابدأي احسبي الوقت من البداية، لازم تكوني صلبة وتصممي على رأيك، علشان يستجيب ويقضي وقت العقوبة.

اقرأ الخبر من مصدره

المصدر | لهلوبة