رجعي علاقتك بالجيم في خطوات بسيطة

Saturday , 26 أغسطس 2017 ,9:43 ص , 9:43 ص

في محاولات التخسيس او المحافظة على الحياة الصحية بنات كتير بتروح الجيم وبعدين تنقطع عنه فترات طويلة وبعدها تحاول ترجع تاني، لكن المشكلة انهم بيخافوا ان الرجوع يكون مرهق جدا او خطر على صحتهم، لكن لهلوبة بتقول لأي حد عايز يستعيد علاقته بالجيم ويكمل في طريق اللياقة والرشاقة ان الخطوات بسيطة ومضمونة.

- ابدأي بحاجات بسيطة:

لانه من الصعب تكملي من نفس النقطة اللي وقفتي عندها، فانتي محتاجة تبدأي بالراحة وبهدوء، لان البداية الشاقة العنيفة ممكن تأذيكي وتخوفك من الجيم بقية حياتك.

- التزمي بنظام الخمس دقايق:

التمرينات الطويلة هتبقى صعبة عليكي، علشان كده اعملي تمرينات مدتها 5 دقايق وبينهم راحة وتكملي كمان 5 دقايق وهكذا لحد ما جسمك يرجع للياقته.

- افتكري الاحساس الحلو:

الرياضة بتحسن الحالة النفسية وبتجعلك منطلقة وحاسة انك مليان طاقة وحركتك أحسن.

- اعملي ميعاد منتظم:

في وسط جدول أعمالك، الرياضة لازم تبقى ميعاد ثابت الجيم لازم يبقى من أولوياتك الاسبوعية أو اليومية، لما تبقى الملحوظة دي قدامك طول الوقت هتنتظمي فيه.

- حضري شنطة الجيم:

خلي شنطة مستلزمات الجيم جاهزة دايما من فوطة ولبس رياضة وغيره، لان ده هيبقى دافع ليكي تنزلي الجيم وتتمرني.

- تحدي الشهر الواحد:

حددي بينك وبين نفسك فترة تتحدي فيها الكسل والتعب، مثلا شهر، لو قدرتي تلتزمي بنزول الجيم يبقى أنتي هتقدري تكملي مشوارك وتبقى الرياضة عادة أساسية في حياتك مش فترة وتعدي.

- اصطحبي رفيق:

الرياضة تحب التشجيع، لازم يبقى معاكي رفيق في الجيم يشجعك على النزول والالتزام والتمرين.

- اوعي تعتمدي على الجيم بس:

لان لوحده مش هيعمل حاجة، لازم الحركة تبقى جزء من حياتك الاساسية علشان تبقى عندك لياقة للجيم، المشي الطبيعي والسباحة وغيرها رياضات مهمة جدا أكتر من نزول الجيم وعمل التمرينات.

- اتمرني لنفسك مش لأي حد تاني:

قبل ما تنزل تتمرني لازم يكون ده قرارك ولمصلحتك مش بتأثير من أي حد، ده اكتر دافع هيخليكي تكملي.

اقرأ الخبر من مصدره

المصدر | لهلوبة