5 حيل هتساعدك تنضفي بسرعة قبل العيد

الخميس , 24 أغسطس 2017 ,11:27 ص , 11:27 ص

اول ما العيد ايامه بتقرب بنبتدي ننضف البيت علشان يكون منظم ومرتب، لكن عملية التنضيف مجهدة جدا على كل ست وبتاخد وقت، ولان لهلوبة عايزة راحتك وبتحب تنجزلك الامور، هتقولك حيل تسهل عليكي التنضيف، وتساعدك تخلصي بسرعة.

1- الحنفيات من الحاجات المتعبة في تنضيفها وتلميعها سواء كانت في الحمام او المطبخ، لمعيها بورق مشمع او ورق المطبخ هتلاقيها نضفت ورجعت تلمع تاني.

2- لو عايزة تلمعي الارض كويس ممكن تجيبي اي شراب قديم عندك وتدخليه في المساحة وتلمعي بيه الارضيات بالتحديد السيراميك والبورسلين.

3- تنضيف الاكل اللي بيكون لازق في الصواني صعب ومرهق جدا، بس لهلوبة بتقولك انك ممكن تنضفيها بسهولة بانك ترشي ملح في الصينية وافركيها بورق المطبخ، هتلاقي اي بواقي طلعت بسهولة.

4- الدهون والزيوت اللي بتكون لازقة على الفرن ممكن تنضفيها بوضع زيت الزيتون على فوطة نضيفة عندك وامسحي بيها الفرن من بره وجوه هتلاقيه نضف ورجع يلمع تاني، او اخلطي ½ كوباية ميه مع بيكينج صودا ورشي الخليط على الفرن واتركيه لمدة 15 دقيقة، بعدين نضفيه بميه ونشفيه بفوطه ناشفة، وعلشان تنضفي زجاج الفرن، ضعي خل ابيض في ازازة بخاخة ورشي منها على الزجاج واتركيه لمدة 15 دقيقة، بعدين امسحيه بفوطة ناشفة.

5- الكاسات والكوبايات مع مرور الوقت شكلهم بيتغير والصابون بيتراكم عليهم، وعلشان ترجعيهم يلمعوا تاني، اغسليهم بميه وخل، او افركيهم بالملح بعدين اغسليهم بميه فاترة، واتركيهم ينشفوا لوحدهم من غير ما تستخدمي الفوطة.