خدع عن تكبير الصدر.. اوعي تصدقيها

الاحد , 23 يوليو 2017 ,11:37 م , 11:37 م

بعض البنات بتضايق من فكرة ان صدرها صغير وبتحاول تدور على حل لتكبيره، ولان مش كل المعلومات الموجودة حقيقة، فلهلوبة قررت تعرفك بعضها وتقولك هي صح ولا غلط.

وقبل ما نقولك الخدع دي، لازم تعرفي ان الصدر بيتكون من عضلات وغدد لبنية وطبقة من الدهون.

- الرياضة بتكبر الصدر: "الموضوع مش سهل"

في تمرينات معينة ممكن تشد عضلات الصدر، لكن الثدي نفسه خالي من العضلات اللي ممكن تكبر، والموضوع محتاج مجهود وتعب وتحكم في طبقة الدهون مش العضلات.

أما ممارسة الرياضات العنيفة ممكن تخسسك وبالتالي النتيجة هتبقى عكسية.

- السمنة بتكبر والتخسيس بيصغر: "حقيقة"

طبقة الدهون في الثدي هي المتحكم الأول في زيادة أو نقص حجمه، علشان كده فعلا زيادة الوزن وكتلة الدهون في الجسم بتزود حجم الثدي والتخسيس ونقص الدهون بتصغره.

- ادوية منع الحمل بتكبر الصدر: "نسبيا صح"

بعض علاجات تنظيم الحمل بتحتوي على هرمونات الاستروجين والبروجيستيرون، واللي ليهم تأثير على حجم الثدي فعلا نتيجة احتباس السوايل في الجسم اللي بيسببها الدوا.

- حجم الثدي بيزيد قبل الدورة الشهرية: "حقيقي"

المسئول عن الموضوع ده هي الهرمونات اللي بتتغير في الجسم خلال الفترة دي، بالتالي مع زيادتها بيكبر حجم الثدي، ونفس الامر بيحصل مع الحوال.

- الكريمات والمساج بيكبروا الثدي: "خرافة"

الحقيقة انها ابعد ما تكون عن ان يكون ليها التأثير ده، لكن بردو الناس بتحب تجرب وتشتري خصوصا الكريمات اللي بيتعرف عنها انها بتزود سريان الدم في الصدر.

اقرأ الخبر من مصدره

المصدر | لهلوبة