سؤال وجودي.. ليه شخصيات الكارتون بتلبس جوانتي طول الوقت؟

الاحد , 9 يوليو 2017 ,11:19 ص , 11:19 ص

سؤال وجودي .. ليه شخصيات الكارتون بتلبس جوانتي طول الوقت

السؤال دة ممكن يجي على بالك الساعة 2 الصبح بعد ما تكون سألت نفسك كام سؤال من نوعية انا عايش ليه؟ ياترى الكلاب ف جزر المالديف حياتها أفضل من حياتي ؟ طب مرتبي هيزيد أمتى عشان أعرف أشترك ف الچيم؟.. لكن سبحان الله على الرغم من إن الأسئلة الوجودية أغلبها ملوش إجابة إلا إن السؤال دة ليه إجابة..

via GIPHY

على فكرة مش انتا لوحدك اللي خطر على بالك السؤال دة.. لأنه في ناس تانية شغلها إنها تلاقي إجابة لنفس السؤال .. زي مثلا فريق موقع (Vox)

اللي قرروا ياخدوا خطوات على الأرض ويبحثوا ويدوروا على سبب لبس الشخصيات الكارتونية للجوانتي طول الوقت..

via GIPHY

وفعلا لموا بعضهم وراحوا طلعوا على جون كانيماكر مؤرخ الرسوم المتحركة ف جامعة نيويورك اللي رجع بضهره لورا وقالهم : يااااه رجعتوني للذي مضى طيب أقعدوا وانا أقولكم الإجابة ..

كانيماكر كان ليه وجهة نظر ف الموضوع دة وبيقول إنه ف بداية ظهور فن الرسوم كانوا بيرسموا جوانتي للشخصيات عشان يسهلوا على نفسهم .. وبقى مع الوقت تقليد من تقاليد الشغلانة..

وإعتمد كانيماكر ف وجهة نظره على كلام والت ديزني اللي بيقول إنه لما فكر يرسم شخصية ميكي ماوس حب يديها طابع إنساني شوية .. ف مكنش هيبقى حلو إنه يرسم إيده زي إيد الفار .. وف نفس الوقت لما جرب يرسمه بإيد بني آدم لقى إن خمس صوابع كتير على حجمة الصغير فخلاهم أربعة بس .. أما عن الجوانتي فكان عشان يبرز حركة الأيد خصوصا إن الرسوم المتحركة كانت بالأبيض والأسود.. فشخصية زي ميكي ماوس كلها لونها وكتلتها الحركية بالأسود.. بالتالي حركاتها مش هتكون ظاهرة أوي ف الحل كان ف الجوانتي الأبيض..

via GIPHY

وبما إن والت ديزني هو صانع أول شخصية رسوم متحركة ناجحة بجد ف التاريخ فكان أي تقليد بيتبعه كان الكل بيمشي وراه ويقلده عشان كدة حتى بعد إختراع الألوان فضلنا نشوف شخصيات كتير لسه بنفس الجوانتي زي بينوكيو مثلا..

مننكرش إن وجهة نظر جون كانيماكر كانت ظريفة ومُرضية لناس كتير خصوصا محبين ديزني .. لكن للأسف مش دي الحقيقة الكاملة

فرق الـ minstrels سنة 1952

الحقيقة المرة بتقول..

إن فن الرسوم المتحركة هو فن مستوحى من عروض الـ minstrels ودة مصطلح كان بيتقال على فئة من المغنين ف منتصف القرن العشرين.. كانوا ميكس من مغنيين على مهرجين على استعراضيين على كوميديانات بيقدموا عروض مسلية ومضحكة لفئة النبلاء..

أكتر حاجة كانت بتميز الـ minstrels هي طريقة لبسهم المضحكة والجوانتي اللي كان تقليد مهم ف لبسهم.. فكان أغلبه واسع وملون وكانوا بيحطوا مكياج لونه أسود وطبعا دة كان فيه شكل كبير جدا من أشكال العنصرية ضد السود ..

يمكن الحقيقة دي تبان حزينة شوية لكن الخبر السعيد إن كل دة كان ف الماضي وإن الإمريكان السود اللي بيسموهم دلوقتي الأفروأمريكان مبقوش مضطهدين ولا حاجة وكل دة إنتهى عهده من زمان.. حتى الـ minstrels مبقوش موجودين واللي إتبقى منهم شوية ذكريات وحكاوي عنهم.. وحل محلهم دلوقتي عروض السيرك والإستاند اب كوميدي وفضل من الحدوتة دي كلها الجوانتي وبس..

ياللا.. نشوفكوا تاني قريب ف حدوتة جديدة.. أوريفوار

اقرأ الخبر من مصدره

المصدر | دوت مصر