ازاي تقنعي اهلك بعريس متقدملك

الخميس , 22 يونيو 2017 ,5:08 م , 5:08 م

" هو بيحبني وانا بحبه، بس اهلي رافضين"، الجملة المعتادة اللي بنسمعها من بنات كتير متقدم لها واحد هي موافقة عليه، واهلها ليهم وجهة نظر تانية ورافضينه، وبتكون محتارة تعمل ايه علشان تقنعهم بيه، لهلوبة عندها الحل :

1- تاكدي من مشاعرك تجاهه:

اعرفي كويس جدًا انت بتحبيه فعلا ولا ده مجرد اعجاب، اسالي نفسك، هل هو الشخص اللي ممكن تكملي معاه باقي حياتك، وفكري في اسباب رفض اهلك ليه وقيميها كويس، علشان تعرفي تقنعيهم بيه .

2- احكي عن مميزاته:

لما تروحي البيت افضلي احكي مع اهلك عن مميزاته ومواقفه الحلوة معاكي وانه جدع في حاجات كتير غيرك اتخلوا عنك فيها، ده بيساعد ان حد من العيلة يعجب بيه وبشخصيته ويبدأ يفكر في الموضوع.

3- اطلبي المساعدة:

الطريقة دي كتير اوي بتجيب نتيجة فعالة، اتكلمي مع شخص اهلك بيثقوا في رأيه، وخليه يحاول يقنعهم بالموافقة على العريس وانك مقتنعة بيه جدًا.

4- بلاش العصبية:

مهما حصل بلاش تتعصبي على اهلك وتبيني قد ايه رايهم غير مهم عندك، علشان ممكن يعندوا معاكي ويفضلوا مصممين على رأيهم.

5- اتكلمي مع اهلك:

اقعدي مع باباكي ومامتك واتكلمي معاهم بهدوء وعبري عن مشاعرك تجاه الشخص ده، وانكم بتبادلوا بعض الحب، وان يهمك في نفس الوقت رضاهم، وانك كمان مسؤولة عن نتيجة اختيارك.

اقرأ الخبر من مصدره

المصدر | لهلوبة