نقد قاسٍ للرئيس من أبرز مؤيديه

الثلاثاء , 31 يناير 2017 ,1:32 ص , 1:32 ص

هاجم الدكتور خالد رفعت، رئيس مركز طيبة للدراسات السياسية والاستراتيجية، الرئيس عبدالفتاح السيسي؛ بسبب تصريحاته التي قال فيها: «إحنا فقرا أوي».

وانفعل الرئيس عبدالفتاح السيسي، أثناء مشاركته في الندوة المعدّة للحديث عن الصناعات الصغيرة والمتوسطة للصعيد أمس الأول، قائلًا: "إحنا فقرا أوي ولازم تعرفوا كده.. ودولة فقيرة.. ولازم تفهموا إن أهل الشر مش عايزينكم تعيشوا".

من جانبه رد «رفعت» - وهو من أبرز المدافعين عن الرئيس - على تصريحات الأخير عبر صفحته على موقع التواصل الاجتماعي «فيسبوك»، قائلًا: «أيوة يا سيادة الريس.. إحنا بقينا فقراء أوووووي».

وعدّد 7 إجراءات اتخذ بعضها الرئيس ووقعت في عهده أخرى قال إنها تسببت في فقرنا، قائلًا: «بقينا فقرا في عصرك»، حسب قوله.

وقال «رفعت»: «عشان حفرنا تفريعة للقناة كلفتنا 64 مليار جنيه.. وعملنا حفلة لافتتاحها كلفتنا 240 مليون جنيه ! والإيرادات بتنزل من ساعتها زى ما كل الناس توقعت.. المصيبة الأكبر أننا مش عارفين هنرجع للناس فلوسها فى 2019 منين».

وتابع: «عشان عملنا مؤتمر اقتصادى كلفنا 30 مليون جنيه والعائد صفر!! ومن ساعتها عمالين نعمل مؤتمرات بلا أى عائد».

ومضى بالقول: «عشان بنعمل عاصمة إدارية جديدة بقرض صينى 45 مليار دولار (850 مليار جنيه)». وأضاف: «عشان عندنا 4653 مصنع اتقفل واتشرد العمال وقاعدين نوسع الطرق.. قال إيه عشان تجتذب الاستثمارات اللى هتعمل مصانع جديدة!! طب ما تشغلوا المصانع اللى بتقفل الأول».

وأوضح: «عشان عندنا رئيس مجلس شعب بيشتري عربيات بـ57 مليون جنيه على حسابنا».

واستطرد: «عشان مش بنحارب الفساد بجد.. ده الحرامية الصغيرين اللى بنكشف عدد قليل منهم بيطلعوا سارقين ملايين.. أومال الحيتان الكبار سارقين كام؟!».

وتابع: «أيوه فعلاً إحنا بقينا فقرا وبالأرقام كمان.. فى آخر 3 سنين تضاعف الدين الخارجى والداخلى (يعنى اللى استلفناه فى 3 سنين أكبر من كل اللى استلفناه فى تاريخنا منذ الفراعنة) وانهارت العملة إلى ثلث قيمتها وتضاعفت الأسعار (التضخم أصبح 24.3%) وكل الخراب ده حصل فى آخر 3 سنوات فقط!».

واختتم كلامه قائلًا: «طب ينفع نبقى فقرا وربنا قال علينا "خزائن الأرض؟!!!!"... ده إحنا عندنا قناة السويس وتلت آثار العالم وزراعة و92 مليون قوى عاملة وبترول وغاز ومعادن ومناجم دهب... لا يا ريس إحنا مكناش فقرا... إحنا بقينا كده فى عصرك فقط».

اقرأ الخبر من مصدره

المصدر | المصريون