أوقات كتير مننا بيتفاجئ بمناطق ورامة في جسمه من غير ما يعرف السبب الحقيقى ليها، وعلى الرغم من أن بعض الحالات الاسباب بتكون بسيطة، لكن في أوقات تانية لازم ننتبه كويس ليها لأن ده ممكن يكون زي ما الأطباء بتقول دليل على مشكلة مرضية، وده اللي لهلوبة هتقولك عليه في السطور اللي جاية.
1- تورم القدم دليل على زيادة نسبة الأملاح في الجسم واحتباس للسوايل، ودي علامة لازم تنتبهي ليها، ومن الاحسن يكون في متابعة مع الطبيب المختص، أو على الأقل تخفضي نسبة الملح يوميًا وتبدأي في تناول كميات كبيرة من الميه على مدار اليوم.
2- تورم الكفين مع وجود احمرار في الجلد، دليل على وجود حساسية ولازم يكون ليها متابعة سريعة وفعالة مع الدكتور، وممكن تتناولي مضادات الهيستامين اللي بيكون ليها دور فعال في حل المشكلة مؤقتًا.
3- الخلل الهرموني دليل على احتباس وتراكم السوايل في الجسم، واللي غالبًا بتكون في منطقة البطن، واللي لازم لو ظهرت عليكي تبدأي تغيري النظام الغذائى الخاص، بالاضافة للمتابعة الفورية مع الطبيب.
4- لو بتعاني من ورم في وجهك كل يوم الصبح، دي علامة خطيرة على وجود مشكلة في الكلى، واللي بتصاحبها أعراض زي ألم اسفل البطن وتغيير في لون البول، وهنا يفضل الذهاب للطبيب في أسرع وقت ممكن.
5- تورم القدم مش بس دليل على زيادة نسبة الأملاح في الدم، لكن لو صاحبه تورم في البطن، لازم ننتبه لان دي علامة خطيرة على وجود مشكلة في القلب.
6- أوقات بيكون في نتايج عكسية للأدوية، زي المسكنات أو خوافض الحرارة اللي أحيانا بتسبب تورم في الوجه، وده اللي لازم يحدده الطبيب المعالج ليكي.
