اول دورة شهرية عند البنت تعتبر من العلامات الفارقة في حياتها، لان معناه انها انتقلت من مرحلة الطفولة للبلوغ، والام لازم تعرف ازاي تستقبل الامر ده وتتعامل معاه كويس، ولهلوبة هتقولك ازاي تعملي ده
1- اسأليها عن الدورة الشهرية:
ممكن تخجل من الاجابة، لكن بطريقتك تقدري تحسسيها بالامان، لان معرفة المعلومات اللي لازم البنت تعرفها، هيساعدك كأم انك تعرفي بنتك محتاجة ليه، وهيزيل بينكم اي حرج، كمان هتكون قادرة لاستقبال اول يوم في دورتها الشهرية من غير قلق.
2- فهميها انه حدث سعيد:
لان اليوم ده معناه اكتمال انوثتها، وانها اصبحت بالغة وتركت مرحلة الطفولة، فده يعتبر خبر مفرح انها كبرت وبقت مسؤولة.
3- احضني بنتك في اول دورة شهرية لها:
باركيلها وحسسيها بحبك وانك قريبة منها، ده هيديها دافع معنوي لمواجهة التغيير ولاستقبال الحدث الامر من غير قلق، لان فيه بعض البنات بمجرد ما يشوفوا الدم بيصيبهم نوع من الخوف وعدم الاحساس بالامان.
4- بلاش تسخر ي منها:
بعض الامهات بيقعوا في غلطة انهم بيتكلموا عن اليوم ده مع القرايب والصحاب، الامر ده ممكن يعرضها للحرج، علشان كده بلاش تتريقي على بنتك من طريقة استقبالها لاول يوم في دروتها الشهرية.
5- وجود مكان مخصص لمستلزمات الدورة:
اعملي دولاب في الحمام او شنطة صغيرة في درج الملابس، يكون فيها اي حاجة ممكن بنتك تحتاجها او خاصة بيها وقت الدورة الشهرية.