الستات والرجالة مختلفين عن بعض تمامًا، علشان بيكون مطلوب من كل طرف انه يحاول يسعد ويراضي الآخر، بس الاهم انه يعرف يعمل ده ازاي، علشان كده لهلوبة قررت تقولك على صفات مشتركة بين الرجال عايزين يلاقوها في المرأة اللي بيرتبطوا بيها وهي:
1- الاهتمام برأيه:
اهتمي انك تاخدي راي شريكك في القرارات الهامة، زي التقديم على وظيفة جديدة او السفر، لان ده بيعبر عن تقديرك ليه ولتفكيره، والرجل بيحب الست اللي تحترمه، لكن خليكي ذكية وبلاش تستشريه في كل صغيرة وكبيرة.
2- الثقة:
ثقتك في نفسك ومعرفة قيمتك وتأكدك انك جميلة في نظره من اهم الحاجات اللي بتجذب الراجل ليكي، وابعدي عن المقارنة بينك وبين اي واحدة تانية
3- جمال المظهر:
الراجل كائن بصري يعني بيحب ويعجب بعينه قبل أي حاجة، علشان كده لازم تحافظي على أناقتك وجمالك، وبلاش تتعاملي ان شريكك بيحبك في كل حالاتك، علشان تتجنبي اهمال نفسك والاهتمام بيها.
4- الاستقلالية:
الراجل بيحب الست اللي بيعتمد عليها، ويحس انها مسئولة، وفي نفس الوقت تحسسه انها محتاجة له وبتلجأله.
5- التشجيع:
كل رجل بيحب الست اللي بتشجعه وتحاول بكل الطرق مساعدته على التقدم والنجاح في شغله وحياته، ده بيحسسه قد ايه هي بتحبه وواثقة في قدراته، وبيعبر عن مشاركتها ومساندتها ليه.