علق المستشار مرتضى منصور، رئيس نادي الزمالك، على سبب موافقته خوض مباراة القمة أمام النادي الأهلي على ملعب ستاد الجيش الثالث بالسويس، والتي ستقام غدًا السبت في الجولة 34 من مسابقة الدوري المصري الممتاز، رغم إعلانه الرفض التام للعب عليه، وإصراره سابقًا على اللعب بملعب بتروسبورت.
وقال منصور في جلسة جمعته بالجهاز الفني اليوم: "أنا في البداية والنهاية رجل دولة، عضو برلمان عام 2000 ورئيس لجنة الأندية ومايشغلنيش شوية العيال التانية اللي قاعدة على الفيسبوك تقل أدبها وتقولك الله يرحم الزمالك وتقول هيبة الزمالك".
وتابع: "هيبة الزمالك أنك تاخد بطولات مش ملعب يمين أو ملعب شمال، ولازم تبقو عارفين أن من بداية المسابقة الأمن هو اللي بيتحكم فيها يعني مش هنضحك على نفسنا".
أضاف: "قصة الدفاع الجوي كانوا عاوزين يلبسو نادي الزمالك القضية كلها، و لا علاقة لنا أحنا مش أصحاب الملعب أصلاً والتذاكر كانت مطبوعة في مطابع الشرطة، وأتوزعت باللجنة، وقالت أنها قانونية، ومع ذلك كانوا عاوزين يلفقو القضية لنادي الزمالك".
وقال منصور: "أحنا كنا ملسوعين من الشوربة قبل كدة، هنقعد ننفخ في الزبادي؟.. دول شوية عيال صيع اللي قاعدين ملهمش أهل مش متربيين ولا في دماغهم حاجة، ممكن نقول هنلعب في المكان ده غصب عن عين التخين يروحو العيال تقتحم المكان ده الشرطة تتعرضلهم والناس تموت ويقولك هاتو بقى المجلس اللي هو مش مقدر مسئولية البلد".
