الولادة أكتر حاجة بتخوف الأم علشان بيبقى فيها مجهود وتعب وجرح للجسم، خصوصًا لو كانت قيصرية، لكن لهلوبة بتقولك متخافيش هتعرفك على كل حاجة عنها علشان تطمني.
- القيصرية مؤلمة:
لو فاكرة إن الولادة القيصرية مش بتحسي فيها بحاجة تبقي غلطانة، صحيح مع التخدير بتنامى لكن بيبقى فيه ألم بعدها مكان الجرح ومن داخل البطن .
- اهتمى بالأدوية:
لو الدكتور وصفلك أدوية بعد الجراحة لازم تمشى عليها لانها بتساعد في التعافي وتقليل الاحساس بالالم.
- مش هتقدري تضحكي:
بعد الجراحة الضحك الطبيعي صعب عليكي والعطس والكحة، أي حاجة بتحتاج قوة هتبقى مؤلمة، وفوقهم كلهم لازم تتجنبي الامساك طبعا بكل الطرق
- انعدام الاحساس في منطقة الجرح :
مكان الفتح والعملية الاحساس فيه بيقل نتيجة تلف بعض الانسجة و ده لفترة مؤقتة مفيش داعى للقلق .
ازاي تتعافي من الجراحة القيصرية؟
التعافي مش صعب خالص بس محتاج تتبعي مجموعة من النصايح هي:
- الراحة التامة:
لازم بعد الجراحة تاخدي قسط كبير من الراحة، والمفروض تفضلى فى المستشفى 3 أو 4 ايام وبعدها ترتاحي في البيت لمدة 6 أسابيع على الأقل.
- عاملي نفسك زي الطفل:
اعتبري انك طفل صغير لسه بيتعلم المشي والحركة، بلاش تطلعي السلم، ولا تبذلي مجهود، خلي كل احتياجاتك جنبك، واطلبي مساعدة الناس اللي حواليكي، استمري على كده لشهرين أو أكتر لحد ما ترجعي تمارسي حياتك بشكل طبيعي.
- استخدمي مسكنات:
اسألي الدكتور بتاعك عن الأنواع اللي تقدري تاخديها في فترة الرضاعة والمناسبة لدرجة الالم اللي هتحسي بيها، وممكن تستخدمي الكمادات مع المسكنات.
- اتغذي كويس:
التغذية مهمة جدا علشان الجرح يلتئم وتتعافي بسرعة، اهتمي بالأكل الصحي وتابعي مع دكتور تغذية يقولك ايه الاطعمة اللي جسمك محتاج لها، لكن على كل حال اهتمي جدا بالخضار لأنه بيساعد في ادرار الحليب، واشربي سوايل كتير وميه علشان الجسم ينضف نفسه والقدرة على الرضاعه تزيد.
- كلمي الدكتور:
في أعراض لازم لو لقيتيها تكلمي الدكتور فورا زى :
الاحمرار والورم حول الجرح / الألم الشديد / ارتفاع الحرارة / الافرازات اللي ريحتها غير مستحبة / النزيف المهبلي / احمرار أو تورم القدمين / صعوبة التنفس / ألم الصدر / ألم في الثدي