قال الرئيس عبد الفتاح السيسي أثناء زيارته لمحافظة قنا: «ماحدش ياخد حاجة مش بتاعته هي مش طابونة».
وأضاف السيسي، اليوم الأحد: «آخر الشهر استعادة الأراضي باكامل، االلي عايز يدفع أهلا وسهلاً، لينا سنة ونص في إجراءات إدارية».
وتابع: «أنا بصراحة زعلان أوى.. الناس مش لاقية تاكل.. إزاي حد ياخد أراضى مصر وكأنها بتاعته.. محدش هياخد فدان واحد من مصر، والله العظيم ولا فدان واحد، الموضوع في يد الجيش والداخلية»
وقال السيسي إنه يجب مواجهة الواقع كما ينبغي، مؤكدًا أن بعض المرافق بحاجة إلى نحو 100 مليار جنيه لرفع كفاءته.
وأضاف: «الكلام دا إحنا هنسده منين، هنسدد القروض اللي أخدناها من هنا ومن هنا منين؟ الدولة متقدرش تدفعه.. ولما نيجي نقول للناس أنا هزود التذكرة جنيه يقولي أنا غلبان مش قادر.. صحيح.. وأنا كمان غلبان مش قادر، طب ما انا كمان غلبان مش قادر.. اعملك سكة حديد آمنة ونبني بلادنا ولا هنفضل خايفين ناخد قرارات».
وقال السيسي: «إحنا كدولة في سباق إننا نوفر السلع دي بالسعر المناسب، ودا مرتبط بالقمح والزيت والسكر واللحوم والدواجن».
وتحدث الرئيس عن زيادة معدلات استهلاك السكر، وقال إن «استهلاكنا (المواطنين) كان 24 كيلو سنويًا بقى 34 كيلو يعني 3 كيلو شهريًا».
وأضاف السيسي: «إحنا بنعمل اللقاءات دي عشان نقول للمصريين إحنا فين.. ولما أقوله الرغيف بكذا يعرف إذا كانت الحكومة بتاعت بلده واقفة جنبه ولا لأ، وحريصه عليه ولا لأ»، وتابع: «عشان عايز يبقي قلبه (المواطن) معايا زي ما أنا قلبي عليه».